Хитой Тайпейида енгил атлетика бўйича ўсмирлар ўртасида Осиё чемпионати давом этмоқда.
Мусобақаларнинг иккинчи куни 400 метрга югуришда ҳамюртимиз Лилия Манасипова маррага иккинчи бўлиб келди. Лилия стадионни бир айланиб чиқиш учун 54,11 сония сарфлади ва бу билан шахсий рекордини янада яхшилашга муваффақ бўлди. Бу масофада олтин медални малайзиялик Нур Абдразақ қўлга киритди (53,93 сония), бронза медали вьетнамлик Нгок Хоанг Тхайга (55,36) насиб этди.
100 метрга югуриш финали иштирокчилари орасида энг паст шахсий рекорд ҳамюртимиз Нигина Шариповага тегишли эди. Нигина фаолияти мобайнида илк маротаба 12 сониядан тезроқ вақт ичида маррага етиб келди ва 11,87 сония натижа билан бешинчи ўринни эгаллади. Олтин медаль хитойлик Сяо Лин Янга насиб этди (11,58).
Ядро улоқтирувчилар мусобақасида дастлабки икки ўринни эронлик спортчилар Шахин Мехрделан ва Шахин Жафари эгаллашди. Юртдошимиз Артём Давлетов снарядни 16 метр 63 см йўллаб, тўртинчи ўрин соҳибига айланди. Артём шахсий рекордини (18.01) такрорласа, шоҳсупага кўтарилиши мумкин эди.
Узоққа сакраш мусобақасида хитойлик Қин Лин 7 метр 99 см натижа билан олтин медаль эгасига айланди. Ўзбекистонлик Тимур Хуснуллин 7 метр 05 см натижа билан 19 иштирокчи орасида 12-ўринни эгаллади.
Чемпионат 15 июнь куни ниҳоясига етади.
Омонбой Тўхтамирзаев
