Кот-д`Ивуар ва Япония терма жамоалари ўртасидаги баҳс драматик кечди. Ўйин эрта тонгга яқин бошланганига қарамай, уни томоша қилишга қарор қилганлар асло афсусланишмаган бўлса керак. Балки бу ўйин савия жиҳатдан Англия-Италия баҳсидан ортда қолгандир, аммо ўзининг сюжети ва сценарийси бўйича юқоридаги учрашувдан қолишмади.

Мазкур тўқнашувни иккига бўлиш мумкин. Дастлабки бир соат давомида "самурайлар" анча ишончли ҳаракат қилишди. Осиёликлар Кейсуке Хонданинг ҳаракатлари эвазига тезкор гол уришга муваффақ бўлишди. Шундан кейин Альберто Дзаккерони ўйинни тўла назорат қилишди. Японлар дарвозага зарба бериш, хавфли вазиятларни яратиш борасида африкаликлардан устунлик қилишди. Бироқ Сабри Лямуши майдонга Дидье Дрогбани ташлаганидан кейин барчаси бутунлай ўзгариб кетди. Ивуарликлар нафақат ҳисобни тенглаштиришди, балки олдинга ҳам ўтиб олишди. Вильфрид Бони ва Жервиньо икик дақиқа ичида 2та гол уришди ва ўйин суратини ўзгартириб юборишди. Ушбу голлар қитъадошларимизни "синдириб" қўйди. Дзаккерони шогирдлари ўйин охиригача "нокдаун" ҳолатидан чиқиб кета олишмади.

Иродали ғалабани қўлга киритган Кот-д`Ивуар терма жамоаси Колумбия билан биргаликда гуруҳни бошқаришмоқда. 19 июнь куни пешқадамлар ўзаро тўқнаш келишади. Япония эса Греция билан баҳс олиб боради.

ЖЧ-2014. "С" ГУРУҲИ
КОТ-Д`ИВУАР – ЯПОНИЯ 2:1 (0:1)
Голлар: 0:1 – 16 Хонда, 1:1 – 64 Бони, 2:1 – 66 Жервиньо.
Кот-д`Ивуар: Барри, Орье, Зокора, Бамба, Бока (Джакпа, 75), Тиоте, Ди (Дрогба, 62), Яя Туре, Калу, Бони (Я Конан, 78), Жервиньо.
Япония: Кавасима, Утида, Йосида, Морисиге, Нагатомо, Ямагути, Хасебе (Эндо, 54), Окадзаки, Хонда, Кагава (Какитани, 86), Осако (Окубо, 68).
Огоҳлантиришлар: Йосида (23), Бамба (54), Зокора (58), Морисиге (64).