Бугун эфирга чиққан “Футбол шарҳи” кўрсатувида “Навбаҳор” ҳужумчиси Шаҳбоз Эркиновнинг отаси Фурқат Эсонбоев иштирок этди. “Сўғдиёна”нинг собиқ мураббийи дастур давомида “Навбаҳор” тўғрисида ҳам тўхталиб ўтди.

З.Имомхўжаев: - Фурқат ака, мана “Навбаҳор” ҳам ўз ўйингоҳига эга бўлди. Биласиз, шу кунга қадар жамоа Косонсойда ўйинларни ўтказди. Барчага Косонсойда ўйинларни ўтказилиши бир мунча қийинчилик туғдирганди. “Олмалиқ” билан ўйиндан сўнг ўғлингиз билан янги ўйингоҳ, учрашув ҳақида гаплашдингизми?
Ф.Эсонбоев: - Ҳа, суҳбатлашдим. Ота-бола бўлсакда, ўғлимдан жамоанг пул тўлаяптими, йўқми, деб сўрамайман. Унга доим уқтириб келаман - сен футболчисан, майдонга чиққанингда бошқа масалаларни ўйламасдан фақат ўйингоҳга келган мухлислар учун ўйнагин, дейман. Майдонга чиқдими, демак фақат ўйинни ўйлаши лозим. Эндиликда “Пахтакор”, “Бунёдкор” жамоаларининг ўйингоҳларидаги шароитлар Наманганда ҳам бор. “Навбаҳор” ўйингоҳининг майдони ҳам, ечиниш-ювиниш хоналари, хуллас барчаси аъло даражада. Бу билан наманганлик мухлисларни табриклайман. Агар жамоада молиявий муаммолар бўй кўрсатмаса, биз олдинги “Навбаҳор”ни кўрамиз.