АҚШ терма жамоаси Бразилияга ташриф буюрган ўзининг кўпминг сонли мухлисларини қувонтирди. Улар Гананинг қаршилигини енгиб, илк ўйинда 3 очкони қўлга кирита олишди.

Мазкур ўйинда ЖЧ-2014нинг энг тезкор голи киритилди. Биринчи дақиқадаёқ Клинт Демпси жарима майдончасидан йўллаган зарбаси орқали ҳисобни очди. Африкаликлар биринчи бўлимда тўпни кўпроқ назорат қилишди, аммо Ховард дарвозасига жиддий хавф сола олишмади.

Иккинчи бўлимда эса "қора юлдузлар" босимни оширишди ва ҳисобни тенглаштириш учун бир қанча имкониятларга эга бўлишди. Кутилган голни эса 82-дақиқада Андре Айю рақиб дарвозасига йўллади.

Ушбу голдан кейин африкаликлар руҳланиб, янада босимни оширишлари кутилганди, бироқ ўйин тугашига 4 дақиқа қолганидан АҚШ бурчак тўпини тепиш ҳуқуқига эга бўлди ва мана шу "стандарт" уларга ғалаба келтирди. Жон Брукс бош билан тўпни дарвоза тўрига жойлаб қўйди.

ЖЧ-2014. "G" ГУРУҲИ
ГАНА – АҚШ 1:2 (0:1)
Голлар: 0:1 – 1 Демпси, 1:1 – 82 А. Айю, 1:2 – 86 Брукс.
Гана: Квараси, Опаре, Менса, Бойе, Асамоа, Рабиу (Эссьен, 71), Мунтари, Атсу (Адома, 78), А.Айю, Ж.Айю (К. Боатенг, 59), Гьян.
АҚШ: Ховард, Жонсон, Кэмерон, Безлер (Брукс, 46), Бисли, Беккерман, Брэдли, Ж.Жонс, Бедойя (Зуси, 77), Демпси, Алтидор (Юханнссон, 23).
Огоҳлантиришлар: Рабиу (30), Мунтари (90).