“Олмалиқ” – “Бунёдкор” учрашувидан кейин “қалдирғочлар” устози Сергей Лушаннинг ўйин ҳақидаги фикрлари билан қизиқдик.

- Аввало ғалаба қозониб, ярим финалга йўлланма олганимиздан хурсандман. Натижадан ҳам, шогирдларим кўрсатган ўйиндан ҳам кўнглим тўлди. Биз тўғри йўлда ривожланаётганимизни бугунги баҳс кўрсатиб берди. Футболчилар секин-аста мураббийлар штаби қандай ўйинни хоҳлаётганини тушуниб етишмоқда. Ўйлайманки, шу тарзда ўсишни давом эттирсак ўзимиз истаган жамоани қурамиз. Бугун ёшларга ҳам имкон бердик. 1996 йилда таваллуд топган ҳимоячи Акром Комилов тўлиқ ўйнади ва ўзини худди узоқ йиллардан бери “Бунёдкор”нинг асосий таркибида ўйнаётгандек тутди. Шунингдек, захирадан майдонга қўшилган Достонбек Ҳамдамов ҳам ўйинга яхши киришиб кетди. Темур Аюпов ҳақида ҳам шундай фикрдаман. “Олмалиқ” жуда кучли жамоа. Олмалиқларнинг ҳар бир чизиғида маҳоратли ўйинчилар йиғилган. Бугунги баҳсда уларга бўш худудлар яратмадик ва олдинга боришга имкон бермадик. Айнан шу жиҳат ҳам йирки ҳисобдаги ғалабамиз омили бўлди, - дейди Сергей Иванович.