Самарқанднинг "Динамо" клуби ва Наманганинг “Навбаҳор” клублари ўртасидаги ўйиндан сўнг матбуот анжуманининг иккинчи қисмида “Навбаҳор” клуби бош мураббийи Бахтиёр Ашурматов иштирок этди.
— Бугунги ўйиндан кўнглим тўлмади. Шогирдларим жуда ёмон ўйнашди. Биринчи даврадаги энг ёмон ўйинимизни ўтказдик деса ҳам бўлади. Бугунги ўйинимиз учун мухлислардан узр сурайман. Барча айбни эса ўз зиммамга оламан. Биринчи даврани ғалаба билан якунлашни истагандик, аммо ўз хатоларимиз қимматга тушди. Мураббий сифатида эса ўз устимда янада кўпроқ ишлашим керак. Самарқанд жамоасини эса ғалаба билан табриклайман.
— Якунига етган биринчи даврани сарҳисоб қилган ҳолда, айтингчи, жамоангиз кўрсатган ўйинлардан кўнглингиз тўлдими?
— Қониқмадим деб бемалол айта оламан. Биринчи даврани 5 ўринда якунлашни ўз олдимизга мақсад қилиб қўйган эдик. Амма берган ваъдамизда тура олмадик. Молиявий масалаларга тўхталадиган бўлсам, ҳозирда ҳеч қандай муаммолар йўқ. Бу учун жамоа раҳбариятига ўз миннатдорчилигимни билдираман. Футболчими ёки мураббийми ўз олдига доим юқори мақсад қўйиши керак. Агар у бешинчи ўрин олдим ва менга шунинг ўзи етарли деб ҳисобласа, у усишдан тўхтаб қолади. Бугунги ўйинда ютганимизда биринчи даврани кўтаринки ўтказдик дея олардим.
— Биринчи даврадан кейин "Навбаҳор"га кимлар келиши ёки клубдан кетиши мумкин?
— Шогирдларимга тўлиқ ишонаман. Мавсум бошида ҳам уларга ишонишимни айтганман. Бир икки футболчи жамоага келиб қўшилиши мумкин. Кетадиганлар бўлса, бемалол мен билан суҳбатлашишсин. Уларни мажбурлаб клубда олиб қолмаймиз.
