Бразилияда ўтаётган Жаҳон чемпионатининг гуруҳ баҳслари учинчи турида Италия ва Уругвай терма жамоалари ўзаро баҳс олиб борган ва унда Италия терма жамоаси 0-1 ҳисобида мағлубиятга учраб, мусобақадаги иштирокини эрта якунлаган эди. Энг қизиғи, ушбу учрашувда уругвайлик ҳужумчи Луис Суарес италиялик ҳимоячи Кьеллинининг елкасидан тишлаган ва ФИФА Тартиб-интизом қўмитаси томонидан терма жамоа иштирокида 9 ўйиндан ҳамда футболга оид ҳар қандай фаолиятдан 4 ойга дисквалификация қилинган эди.
Ўша вазият қурбони бўлган Жоржо Кьеллини бугун ўзининг расмий сайтида Суаресга қарши чиқарилган ФИФА қўмитасининг қарорига ўз муносабатини билдирувчи мақолани эълон қилди. Унда шундай дейилади:
"Ҳозир менинг қалбимда ўша кунги содир бўлган вазият билан Суаресга нисбатан на нафрат, на хурсандчилик, на ғазаб бор. Мен фақат Уругвай билан ўйиндаги натижадан ҳамда мусобақадан чиқиб кетганимиздан ғазабдаман. Айни вақтда мен Суарес ва унинг оиласи ҳақида ўйламоқдаман, чунки улар жуда қийин муддат билан тўқнашмоқдалар. Мен ҳар доим мусобақа ташкилотчиларининг юзага келадиган вазиятларни олдини олишга қаратилган чоралар кўришини тушуниб келганман. Бироқ, шу билан бирга таклиф қилинган жазо жудаям узоқ муддат. Мен чин дилдан умид қиламанки у ўз жамоадошлари билан қолиб, уларга далда бўлиб туришига рухсат берилади, чунки бундай тақиқлар футболчини спортдан бездириб қўйиши мумкин".
