Германия терма жамоаси бош мураббийи Йоахим Лёв Ч-2014 1/8 финалида Жазоирга қарши ўйин олдидан фикрлари билан ўртоқлашди.
"Бу баҳс олдидан 1982 йилги ўйин учун қасос олиниши ҳақида гап кетса, менинг жаҳлим чиқади. Бизнинг аксарият ўйинчиларимиз 1982 йилда туғилмаган ҳам эдилар. Жазоир бизни нима учун жазоламоқчи? Менга тушунарсиз.
Бизнинг ўйинчилар бу тарих ҳақида билмайдилар ҳам. Биз бу ҳақда гапирмаймиз ҳам, аммо кимдир Жазоирга яхши туртки бериш учун шундай қилгандир", - дейди Лёв.
Эслатиб ўтамиз, ЖЧ-1982 гуруҳ босқичида Жазоир,Германия ва Австрия термалари иккитадан ғалаба қозониб, бир мартадан мағлубиятга учраган эдилар. Сўнгги турда Германия термаси Австрияни 1:0 ҳисобида енгган ва икки Европа жамоаси кейинги босқичга йўл олишини таъминлаганди.
Шу воқеадан сўнг ФИФА гуруҳ босқичи сўнгги турини бир вақтда ўтказиш ҳақида қарор чиқарган эди.
