Ўзбекистонлик Равшан Эрматов ЖЧ финалида ҳакамлик қилмаслиги аниқ бўлганидан кейин Sayyod.uz сайти эстрада хонандалари ва кино актёр-актрисаларининг фикрлари билан қизиқди.

Райҳон: "Биз ҳаммамиз унга "болеть" қилгандик (шу сўзни аниқ таржимасини ҳеч топа олмадим - Сайёд). Лекин нима бўлса ҳам Жахон чемпионатидаги иштирок этиш ва айниқса финалгача боришни ўзи катта шараф! Мен ундан жудаям фахрланаман! Бизнинг ҳам футбол командамиз Жаҳон чемпионатида бўлишига умид қиламан".

Обид Асомов: "Жудаям хафа бўлдим, лекин шу кунгача эришган ютуқларини ўзига уни Ўзбекистон қаҳрамони деса бўлади. Соғлиқ ва омад тилайман".

УММОН гуруҳидан Шоҳрух: "Дабдала бўлибди! *** (бииип) экан унда улар! Мана фикрим!"

Ширин Ғофурова ("Водий садоси" радиобошловчиси): "Ҳа, эрталабдан нохуш хабар бўлди. Риццоли ҳақида биринчи маротаба эшитишим. Европа ва Лотин Америкаси матчига Осиё реферисини қўйиш адолатлироқ бўларди, деган фикрдаман. Афсус. Аммо Равшан ака бу чемпионатнинг энг аъло рефериси! Биронта хатосиз, хеч қандай шоусиз ва ўзига диққат эътиборни қаратмаган ҳолда ҳакамликни аъло даражада уддалади. Офарин! Менимча, финал учун уни ҳали ёш деб баҳолашган бўлса керак, бўлмаса бошқа камчиликларни унда кузатиб бўлмайди. Турмуш ўртоғим билан Германия элчихонаси боғида финал матчини кўргани отлангандик, афсус Эрматовни ҳакамликда кўрмас эканмизда... 2018 йилги Россияда ўтадиган чемпионатда Равшан Эрматов финалида ҳакамлик қилади деб умид қиламан ёки жа бўлмаса бизнинг футболчилар у чемпионатга чиқа олишар".

Зоҳир Шоҳ Жўраев: "Ноҳақлик! Доимгидек монополия, ҳеч қачон зўрни кўра олишмайди. Ҳар ерни ўз "запрет"лари бор, ҳеч ким тўғри рақобатлашмайди. Барибир юртдошимизга раҳмат, шу ерда ҳам юртимиз байроғини баланд кўтаргани учун!

Адиз Ражабов: "Ўйин давомида ҳар сафар Равшан Эрматовни кўрсатишганида мен фахрланиб қувонардим. Камтарона табассум ва шубҳасиз профессионализм соҳиби бўлган бу инсон ҳамманинг қалбидан жой ола олди. Финалда ҳакамлик қилмаслигидан оғриндим, аммо футбол бу билан якунланмайди, чемпионатлар ҳали кўп булади!"