Италия терма жамоасининг собиқ бош мураббийи, ҳозирги вақтда Туркиянинг «Галатасарай» жамоасига устозлик қилаётган Чезаре Пранделли янги жамоаси билан Римга боришга қўрқмоқда, дея хабар бермоқда Football Italia.

Бразилияда якунига етаётган ЖЧ-2014даги Италия терма жамоасининг муваффақиятсиз иштирокидан сўнг, мутахассис италиялик ғазабланган мухлислардан кўплаб таҳдидли хабарлар олган.

Пранделлининг маълум қилишича, унга ва оиласига қилинган таҳдидлардан сўнг, у Италияни тарк этишга қарор қилган. Хабар беришларича, «Галатасарай» 19 августда Римда маҳаллий «Рома» жамоасига қарши ўртоқлик учрашуви ўтказиши керак.

Пранделли 2010-2014 йиллар давомида Италия терма жамоасига устозлик қилди. «Скуадра адзурра» билан биргаликда у Евро-2012нинг кумуш, 2013 йилги Конфедерациялар Кубогининг бронза медалларини қўлга киритди.

Бразилиядаги мундиалда италияликлар гуруҳдан кейинги босқичга чиқа олишмади. Миллий терма жамоадаги фаолиятига қадар Пранделли «Фиорентина», «Рома», «Парма», «Верона», «Лечче», «Аталанта» клубларида фаолият олиб борган.