Александр Мочинов бош мураббийлигидаги Ўзбекистон U-16 ўсмирлар терма жамоаси 15-25 июль кунлари Туркиянинг Истанбул шаҳрида ташкил этиладиган халқаро турнирда иштирок этиши ҳақида хабар берган эдик.

15 июль куни Туркияга жўнаб кетган Ўзбекистон U-16 ўсмирлари бугун турнирдаги илк ўйинини Саудия Арабистони U-16 ўсмирларига қарши ўтказади. Шу йилнинг сентябрь ойида Таиландда бўлиб ўтадиган U-16 ўсмирлар ўртасидаги ОЧ баҳсларига тайёргарлик кўраётган Ўзбекистон U-16 ўсмирлар терма жамоаси режага кўра Туркияда жами тўрт учрашувда майдонга тушади.

Саудия Арабистонига қарши ўйиндан ташқари Мочинов шогирдлари 20 июль куни Иордания, 22 июль куни Қатар ва 24 июль куни БАА ўсмирларига қарши ўйнаши режалаштирилган.

Эслатиб ўтамиз, Ўзбекистон U-16 ўсмирлар терма жамоаси 2-11 июль кунлари Тошкентда йиғин ўтказишган ва ЖАР стадионида Уммон U-16 ўсмирлар терма жамоасига қарши иккита ўртоқлик учрашувида майдонга тушган эдилар. Терма жамоалар ўртасидаги илк учрашувда Ўзбекистон U-16 ўсмирлари 2:0 ҳисобида ғалаба қозонишган бўлса, ўзаро иккинчи ўйинда Уммон ўсмирлари 2:1 ҳисобида ғалаба қозонди.