Кеча “Пахтакор” жамоасининг Қибрайдаги жойлашган қароргоҳида иккинчи даврага таёргарлик доирасида “Бухоро” жамоасига қарши назорат учрашуви бўлиб ўтди.

“Пахтакор” мураббийлар штаби биринчи бўлимда майдонга бир қатор ёш футболчиларни туширди. Таъкидлаш лозим, айнан шундай ўйинлар орқали асосий таркибга номзод бўлган футболчилар ўзларини кўрсатиш имкониятига эга бўладилар. Ўйинга тўхталадиган бўлсак, биринчи бўлимнинг илк дақиқаларидан учрашув майдон маркази учун курашда кечди. Бўлим ўрталарига келиб “Бухоро” футболчилари бир нечта ҳужум ташкил қилдилар, лекин бу вазиятларда Лобанов яхши харакат қилди. Бўлим сўнгида Даврон Хошимовнинг жарима майдони ташқарисидан берган зарбасидан сўнг, тўп дарвоза тўсинига тегди.

Иккинчи таймда “Пахтакор” таркиби кескин ўзгарди. Майдонга тажрибали футболчилар Анвар Солиев, Ойбек Қиличев ва Шерзод Каримов тушганидан сўнг, устунлик бутунлай тошкентлик футболчилари томонига ўтди. Биринчи даврани ижара асосида БАА чемпионатида ўтказган Қилиевнинг тўп узатишлари “Бухоро” ҳимоячиларини шошириб қўйди, десак муболаға бўлмайди. Шундай вазиятларнинг бирида Ойбек жарима майдони ичидан туриб тўпни Анвар Солиевга етказди. Ҳужумчи тўп учун курашда ҳимоячидан устун келди ва боши билан дарвозани ишғол қилди 1:0. Бир оз вақтдан сўнг, Қиличевнинг ўзи жарима зарбасидан сўнг ҳисобни ошириши мумкин эди, лекин дарвозабон қийинчилик билан бўлса ҳам тўпни қайтарди. Мураббийлар штаби ўйин давомида биринчи бўлимда майдонга тушган барча футболчиларни алмаштирганликларини таъкилаш лозим.

Шундай қилиб, ўқув-назорат йиғинлари доирасидаги биринчи учрашув “Пахтакорнинг” кичик ғалабаси билан якунланди.

“ПАХТАКОР” – “БУХОРО” – 1:0 (0:0)
Гол: Анвар Солиев
“Пахтакор”: Лобанов, Мерзляков, Кримец, Ҳошимов, Исматуллаев, Козак, Фомин, Махарадзе, Машарипов, Искандеров, Сергеев.
Захира: Рибкин, Каримов, Андреев, Солиев, Махсталиев, Хакимов, Юсупов, Рогованов, Қиличев, Иброҳимов