Ўзбекистон U-16 ўсмирлар терма жамоаси Туркиянинг Истанбул шаҳрида старт олган халқаро турнирдаги илк ўйинида Саудия Арабистони ўсмирларига 0:3 ҳисобида мағлуб бўлди.

15 июль куни Туркияга жўнаб кетган Ўзбекистон U-16 ўсмирлари 17 июль куни Истанбул вақти билан соат 23:00да турнирдаги илк ўйинини Саудия Арабистони U-16 ўсмирларига қарши ўтказди. Александ Мочинов шогирдлари учрашувда бир қанча вазиятларга эга бўлишига қарамай, якунда саудиялик ўсмирларга йирик ҳисобда мағлуб бўлишди - 0:3.

Александр Мочинов бош мураббийлигидаги Ўзбекистон U-16 ўсмирлар терма жамоаси турнирдаги кейинги ўйинини 20 июль куни Иордания U-16 ўсмирларига қарши ўтказади. Шунингдек Ўзбекистон U-16 ўсмирлари 22 июль куни Қатар ва 24 июль куни БАА ўсмирларига қарши ўйнаши режалаштирилган.

Эслатиб ўтамиз, Ўзбекистон U-16 ўсмирлар терма жамоаси шу йилнинг 6-20 сентябрь кунлари Таиландда бўлиб ўтадиган U-16 Осиё Чемпионати финал босқичида иштирок этади.