Ўзбекистон U-16 ўсмирлар терма жамоаси Туркиянинг Истанбул шаҳрида давом этаётган халқаор турнирдаги иккинчи ўйинида Қатар U-16 ўсмирлар терма жамоаси билан 1:1 ҳисобида дуранг ўйнади.

15 июль куни Туркияга жўнаб кетган Ўзбекистон U-16 ўсмирлари 17 июль куни турнирдаги илк ўйинини Саудия Арабистони U-16 ўсмирларига қарши ўтказган ва 0:3 ҳисобида мағлуб бўлган эди. 19 июль куни Александр Мочинов шогирдлари турнирдаги иккинчи учрашувида Қатар U-16 ўсмирларига қарши тўп сурди ва қизиқарли кечган учрашувда 1:1 ҳисоби қайд этилди. Ўзбекистон ўсмирларининг ўйиндаги ягона голига Суҳроб Нуруллоев муаллифлик қилди.

Маълумот ўрнида, турнир тақвимида ўзгариш юзага келган. Унга кўра, Иордания U-16 ўсмирларига қарши ўйин аввалдан режалаштирилганидек 19 июль эмас, балки 22 июль куни бўлиб ўтади. Шу тариқа Александр Мочинов бош мураббийлигидаги Ўзбекистон U-16 ўсмирлар терма жамоаси турнирдаги кейинги ўйинини 22 июль куни Иордания U-16 ўсмирларига қарши ўтказади. Турнирдаги сўнгги ўйин эса 24 июль куни БАА ўсмирлар терма жамоасига қарши ўтказилади.

Эслатиб ўтамиз, Ўзбекистон U-16 ўсмирлар терма жамоаси шу йилнинг 6-20 сентябрь кунлари Таиландда бўлиб ўтадиган U-16 Осиё Чемпионати финал босқичида иштирок этади.