Бугун куннинг иккинчи ярмида “Андижон” жамоаси йиғин ўтказиш учун Тошкентга жўнаб кетди. Бир қатор клублар каби “Андижон” ҳам пойтахтдаги тайёргарлик давомида “Ўзбекистон” меҳмонхонасида истиқомат қилади.

Кўрикдан ўтиш учун бир нечта янги ўйинчилар таклиф қилинганини айтиб ўтгандик. “Нефтчи” ўринбосарларига қарши кечган назорат учрашувидан кейин Лочин Долимов, Оятилло Муҳиддинов ва Сайриддин Ғаффоровга жавоб берилди. Бу футболчиларнинг ҳаракатларидан Сергей Шевченко қониқиш ҳосил қилмаган кўринади. Шунга қарамай, пойтахтдаги йиғинда таркибга яна янги ўйинчиларни қўшилиши кутилмоқда.

Тошкентда тайёргарлик чоғида футболчилар “Футбол-Мед”да тиббий кўрикдан ўтишади. Бундан ташқари назорат ўйинлари ҳам режалаштирилган. 22 июль куни “Солиқчи” стадионида “Оқтепа” жамоасига қарши учрашув бўлиб ўтади. 24 июлда андижонликлар Красногорскда “Қўқон-1912” жамоаси билан куч синашишади. 26 июль куни рақибимиз “Сўғдиёна” бўлади. Бу ўйин ҳам “Солиқчи” стадионида ўтказилади.