«Шахтёр»нинг олти ва «Металлист»нинг уч нафар жанубий америкалик футболчиси Украинага қайтишдан бош тортди
Донецкнинг «Шахтёр» футбол клубининг олти нафар ўйинчиси Франциянинг «Лион» жамоасига қарши ўйиндан сўнг Украинага қайтишдан бош тортишди, дея хабар бермоқда Canal+’нинг расмий твиттери.

«Шахтёр» футболчилари Украина шарқи, хусусан, Донецкдаги нотинч вазият туфайли Франциядан Украинага қайтиб боришни хоҳлашмаяпти.

Украинага қайтишдан бош тортган олти футболчидан беш нафарининг исми маълум. Булар, бразилиялик Тейшейра, Фред, Дентиньо, Дуглас Коста ва аргентиналик Феррейра.

Ўз навбатида, Харьковнинг «Металлист» футбол клубининг уч нафар аргентиналик футболчиси – Хосе Соса, Алехандро Гомес ва Жонатан Кристальдо ҳам Аргентинада қолишга қарор қилишган.

«Ўзимизни бехавотир ҳис қилмайдиган мамлакатда қолишдан маъно йўқ. Биз бу ердаги вазият барқарорлашмагунича Аргентинада қоламиз, шартномаларимиз бекор қилинмайди», – деди Гомес.

«Малайзия самолёти билан содир бўлган ҳодиса бизнинг сабр косамизни тўлдирган сўнгги томчи бўлди. Менинг аёлим ва кичик ўғлим бор, мен уларнинг ҳаётини хавф остига қўя олмайман. Мен оилам учун жавобгарман», – дея Гомеснинг сўзларидан иқтибос келтирмоқда Infobae.

Маълумот учун, футбол бўйича Украина чемпионатида ўзбекистонлик ярим ҳимоячи Санжар Турсунов («Ворскла») ва ҳужумчи Максим Шацких («Говерла») тўп суради.