Айни пайтда «Навбаҳор» клуби раҳбарияти ва мураббийлар штабини таркибга дарвозабон жалб этиш масаласини кўриб чиқишмоқда. Жамоага таклиф этиш борасида айрим ўзбекистонлик посбонларнинг варианти кўриб чиқилди.

Хусусан, “Нефтчи” жамоаси шарафини ҳимоя қилган Сардор Қобулжонов билан олиб борилган музокаралар футболчини фарғоналиклар билан амалда шартномаси борлиги учун ижобий тарзда якун топмади. Яъни “Нефтчи” клуби раҳбарияти Қобулжоновни қуйиб юборишни истамади. “Бунёдкор”да тўп сураётган Мурод Зуҳуров варианти ҳам кўриб чиқилганди. Аммо, Зуҳуров “қалдирғочлар” сафидаги фаолиятини давом эттиришни лозим топди. Шу сабабли, ўзбекистонлик бўлган дарвозабонни сафга қўшишни имкони бўлмади.

Ҳозирда хорижлик бўлган дарвозабонлар билан музокаралар олиб борилаётганлигини эътироф этиш жоиз. Олиб борилаётган музокаралар ҳали тўлиқ якунланмаганлиги боис иккинчи даврада жамоамизни айнан қайси посбон ҳимоя қилиши борасида аниқ маълумот йўқ. Шундай бўлсада, Болгария фуқароси бўлган дарвозабонни таркибга қўшилиш эҳтимоли юқорироқ бўлиб турибди. Шунга қарамай, болгариялик посбонни ҳам “Навбаҳор” аъзосига айланиши юз фоизга ҳал этилмаган. Дарвозабон масаласи бир-икки кун ичида ҳал бўлади. Барчаси ҳал бўлгач, сайтимиз орқали иккинчи даврада жамоамиз дарвозасини қўриқлаши мумкин бўлган дарвозабон ҳақида маълумот бериб ўтамиз. Демак, сайтимиздан узоқлашмай саҳифаларни кузатиб боришда давом этинг.