Бугун ўзбекистонлик ФИФА рефериси Равшан Эрматовнинг таваллуд куни. Истеъдодли ўзбек ўғлони 37 ёшни қарши олди.

Ватандошимиз ёш бўлишига қарамай, жуда улкан ютуқларга эришди. Бундан 4 йил аввал у ЖЧнинг очилиш учрашувини бошқарган энг ёш ҳакам бўлган бўлса, мазкур йили бўлиб ўтган Мундиалда яна 4та ўйинни бошқариб, жаҳон рекордини ўрнатди. Унинг ЖЧдаги ўйинлари сони 9тага етди.

Равшан Эрматов замонавий ўзбек ҳакамлик мактабининг асосчиси ҳисобланади. Айнан у туфайли ҳакамларимиз ФИФАнинг энг сўнгги янгиликлари билан биринчилардан бўлиб танишишади ва янгиликларни футболга жорий қилишади. Унинг дастлабки шогирдлари ФИФА реферилигига қабул қилиниб, халқаро ўйинларни бошқара бошлашди.

Унинг ютуқлари, юртимиз номини дунё аренасида муносиб ҳимоя қилаётгани давлатимиз ва ҳукуматимиз раҳбарияти беэътибор қолдирмаяпти. У "Ўзбекистон ифтихори" фахрий унвони ва "Эл-юрт ҳурмати" учун орденлари билан мукофотланди.

Бугунги таваллад айёми муносабати билан Равшан Эрматовни муборакбод этамиз. Унга соғлик-саломатлик ва куч-қувват тилаймиз. Ҳамиша энг юқори чўққи сари интиладиган ҳакамимиз ўзи орзу қилган барча ниятларига эришишига тилакдошмиз. Насиб қилса, ЖЧнинг финал баҳси ўзбекистонлик ҳакам томонидан бошқарилади. Биз бунга ишонамиз ва умид қиламиз. Ҳеч қачон омад сизни тарк этмасин, Равшан ака!