Ўзбекистон чемпионатининг июнь ва июль ойларидаги энг яхши футболчиси ва мураббийини аниқлаш бўйича ОАВ ходимлари, журналистлар ўртасида ўтказилган сўровнома 1-5 август кунлари бўлиб ўтди.

Ушбу сўровнома натижасига кўра ойнинг энг яхши футболчилар қаторида иккинчи ўринда қайд этилган Зоҳир Қўзибоев ўз фикрларини билдириб ўтди.

"Албатта бутун Ўзбекистон бўйича ойнинг энг яхши футболчилар қаторидан жой олиш жуда ҳам ёқимли. Очиғини айтсам, жуда-жуда хурсанд бўлдим. Бу менга қўшимча куч бағишлашига ишонаман. Мен учун бундан ҳам муҳими жамоамиз қайд этаётган натижалардир. Шахсий совринлар жамоа ютуғига қараб келаверади" , - дейди Зоҳир Қўзибоев.

— Биринчи даврадан сўнг Олий лига тўпурурлари рўйҳатида ҳам кучли учликдасиз. Бу сиз учун кутилмаган ҳолатми?
— Билмадим. Мен ундай деб ўйламайман. Жамоамизнинг меҳнатини голлар билан кўрсатамиз. Мақсадим эса Олий лигада ҳам тўпурур бўлиш. Кўпроқ гол урсам ғалаба қозонамиз ва "Машъал" юқори поғоналарга кўтарилади. Биринчи вазифам шундан иборат.

— Бугун жамоа олдида қийин учрашув бор. "Машъал" ушбу кунгача ҳали "Бунёдкор" дарвозасини ишғол эта олмаган. Сиз ҳужумчи сифатида буни қандай баҳолайсиз?
— "Бунёдкор" биздан шу кунгача кучли бўлганлиги учун бизни жамоа гол ура олмаган деб баҳолайман. Бугун жамоамиз тарихидаги ушбу қора анъанага чек қўймоқчимиз. Қийин учрашув бўлади ва олдимизда жуда катта тўсиқ бор. Биз майдонни ғалаба билан тарк этмоқчимиз.