"Барселона" ҳужумчиси Луис Суареснинг дисквалификацияси ўз кучидан қоладиган бўлди. Спорт арбитраж суди бугун шундай қарорни эълон қилди.

Бироқ САС Суаресга "Барселона" сафида шуғулланишга рухсат берди. Шунингдек, футболчи ўз клуби сафида ўртоқлик учрашувларида майдонга тушиши ҳам мумкин. Шу боис, Суарес 18 август куни Мексиканинг "Леон" клубига қарши кечадиган ўртоқлик учрашувида "Барса"даги дебютини ўтказиши мумкин.

Эслатиб ўтамиз, ЖЧ-2014 ўйини пайтида Суарес Италия терма жамоаси ҳимоячиси Жоржо Кьеллинини тишлаб олгани учун ФИФА футболчини Уругвай терма жамоаснинг 9та ўйинига дисквалификация қилганди ва 4 ой давомида ҳар қандай футбол фаолияти билан шуғулланишни, жумладан, клуб билан биргаликдан машғулот ўтказишни ҳам тақиқлаб қўйганди. Шу боис "Барселона" Суареснинг тақдимот маросимни "Камп Ноу"да ўтказа олмаганди.

Бу Суарес иши бўйича якуний қарор бўлди ва футболчи 26 октябрь куни майдонга қайтиши мумкин. Шу куни "Барселона" Мадриднинг "Реал" жамоаси билан ўйнайди.