Аввал хабар берганимиздек, Хитойнинг Нанкин шаҳрида бошланган иккинчи ўсмирлар ёзги олимпиада ўйинларининг биринчи куни мамлакатимиз спортчилари стол тенниси, сузиш, дзюдо, спорт гимнастикаси ва оғир атлетика бўйича ўтказиладиган мусобақаларда ғолиблик учун кураш олиб борадилар.

Айни дақиқаларга келиб вакилларимиз орасида дзюдочимиз Суҳроб Турсунов медаллар учун курашишда яхши имкониятга эга бўлиб турибди. Вазни 66 кг.гача бўлган полвонлар беллашувида татамига чиққан Суҳроб биринчи баҳсда болгариялик Стоян Тарапановни муддатдан аввал иппон баҳоси билан енгиб, иккинчи беллашувда украиналик тажрибали спортчи Богдан Ядов қаршилигини енга олмади.

Шундан сўнг Суҳроб ўтиш турнирида иштирок этиш учун дастлаб беларуслик Дмитрий Минковни, сўнгра эса арманистонлик Дермишянни мағлуб этиб, бронза медали учун курашни давом эттириш хуқуқига эга бўлди.

Яна бироздан сўнг ҳамюртимиз бронза медали учун курашда дастлаб Коста-Рика вакили Жулиан Санчо билан беллашади. Агарда ушбу учрашувда мамлакатимиз полвони зафар қучса, бронза медали учун кечадиган баҳсда Хитой ёки Жанубий Кореялик спортчи билан беллашади.  

Суҳроб Турсуновни саралаш баҳсларида енган украиналик Богдан Ядов ярим финалда кореялик спортчини ҳам мағлуб этиб, ҳал қилувчи финал беллашувида япониялик Абе Хифуми билан кураш олиб борадиган бўлди.