Оғир атлетика бўйича вазни 56 кг.гача бўлган спортчилар мусобақасида Ватанимиз шарафини ҳимоя қилган Адҳамжон Эргашев делегациямиз ҳисобига навбатдаги бронза медалини келтирди.

Умидли спортчимиз даст кўтаришда 110 кг., силтаб кўтаришда эса 133 кг. тошни ўзига бўйсиндирди ва иккикураш якунига кўра 243 кг. натижа билан ўсмирлар олимпиада ўйинларининг бронза медалини қўлга киритди.

Мазкур мусобақада олтин медалга 283 кг. натижа (128 кг – 155 кг) билан хитойлик Чен Менг сазовор бўлди. Ҳамюртимиз Адҳамжон Эргашев каби 243 кг. натижа (108 кг – 135 кг) қайд этган вьетнамлик Нгуен кумуш медаль совриндори бўлди.

Маълумки, оғир атлетика спорт турида спортчилар кўрсатган натижа бир хил бўлганда, қай бир спортчининг вазни енгилроқ бўлса, ўша спортчига юқори ўрин берилади. Мазкур мусобақада вьетнамлик спортчининг вазни Адҳамжоннинг вазнидан 40 грамм енгил бўлганлиги боис, кумуш медаль вьетнамлик спортчига берилди.

22 август куни оғир атлетика бўйича ўтказиладиган навбатдаги мусобақаларда яна икки нафар ҳамюртимиз баҳсларга киришади. Ўғил болалар ўртасида ўтказиладиган мусобақада Фарҳодбек Собиров (-85 кг) ғолиблик учун кураш олиб борса, қизлар мусобақасида Камила Абдуллаева (+63 кг) баҳсларда иштирок этади. Ҳар икки спортчимизга ҳам бўлажак мусобақаларда омад ва зафарлар тилаб қоламиз.