Англия Премьер-Лигасининг амалдаги чемпиони - "Манчестер Сити" ҳам янги мавсумни ғалаба билан бошлади.
Мануэль Пеллегрини шогирдлари АПЛнинг янги мавсуми илк турида сафарда "Ньюкасл"га қарши тўп сурди ва ҳар бир бўлимда биттадан гол уриб ишончли ғалабани тантана қилди. Дастлаб, биринчи бўлимнинг 39-дақиқасида Давид Сильва чиройли комбинацияни гол билан якунлади ва ҳисобни очди.
Иккинчи бўлимда ҳам "Сити" рақибига нисбатан анча ишончли ҳаракат қилди. "Ньюкасл"да ҳам бир неча маротаба гол уриш имкониятига эга бўлган эди, аммо мезбонлар шу куни ўзлари яратган вазиятларнинг барчасини кўкка совурдилар. Ўйин оҳирида эса, захирадан майдонга тушган Серхио Агуэро ўйинга якуний нуқтани қўйди - 0:2.
АПЛнинг илк турида деярли ёрқин ва сермаҳсул ўйинлар гувоҳи бўлмадик. Фаворитлар ҳам кутилганидек ёрқин ўйин кўрсата олмадилар. Балки, кўпгина футболчилар ҳали жисмоний ҳолатларини тиклаб олишга улгурмагандирлар. Чемпионат энди бошланди. Қизиқарли ўйинлар эса ҳали олдинда. АПЛдан узоқлашманг!
