Хитойнинг Нанкин шаҳрида ўтказилаётган ўсмирлар олимпия ўйинларида ҳамюртимиз Владимир Свечников 10 метр масофадан тўппончадан ўқ отиш бўйича микст баҳсларида олтин медалга сазовор бўлди.

Болгариялик Лидия Ненчева билан баҳсларга киришган спортчимиз саралаш босқичида Норвегия / Франция спортчиларидан иборат жуфтликни мағлуб этиб, ярим финалда Ҳиндистон / Словения давлати вакилларини, финалда эса Сингапур / Миср дуэтини енгди.

"Албатта, айни пайтда хурсандчилигимнинг чегараси йўқ. Бугун финал мусобақалари ўтказилган жойга Ўзбекистон делегацияси аъзоларининг деярли барчаси келишди ва бутун жамоа бўлиб мени қўллаб-қувватлаб туришди. Шу дамда мен юртдошларимнинг ҳам билвосита қўллаб-қувватлаётганликларини дилдан ҳис этиб турдим. Бу ўз навбатида менга қўшимча куч бағишлаб, ўзимга бўлган ишончни янада оширди. Ушбу ғалабамни тобора яқинлашиб келаётган Истиқлолнинг 23 йиллик байрамига бағишлайман", - дейди биз билан телефон орқали суҳбатда Владимир Свечников.

Ўзбекистон делегацияси айни пайтга келиб 1 та олтин ва 2 та бронза медалини қўлга киритган ҳолда умумжамоа (норасмий) ҳисобда 27-ўринда бормоқда. Медалларни қўлга киритиш борасида Марказий Осиё давлатлари орасида биринчи ўринда боряпмиз.