"Андижон" ва "Олмалиқ" жамоалари ўртасидаги учрашувдан (1:1) сўнг ўтказилган матбуот анжуманининг биринчи қисмида мезбонлар мураббийи Ориф Маматказин иштирок этиб ўйин тўғрисида шундай деди.

— 0:1 ҳисобида ютқаза туриб ўртадаги фарқни тенглаштиришга муваффақ бўлдик. Албатта, бундай иссиқ ҳавода бир хил тепмди ўйин намойиш этиш осон эмас. Балки четдан қараганда осон бўлиши мумкин. Аммо бундай ҳолатда ўйнаш ва вазиятларни яратиш ўзига яраша қийин кечади. Шунга қарамай, футболчилар ирода кучи ва характер кўрсатиб ҳисобни тенглаштира олишди. “Олмалиқ” кучли рақиб эканлиги ҳеч кимга сир эмас. Жамоа таркибида маҳоратли ижрочилар кўп. Мана шундай рақибга қарши ёмон ўйин намойиш этмадик деб ўйлайман. Муҳими очко олдик ва бу кейинги ўйинларда бизга асқотиши мумкин. Ҳали имконият бор ва ишлашда давом этамиз. Ўз навбатида бугун бизни муносиб тарзда қўллаб-қувватлаб туришган мухлисларимизга раҳмат айтаман. Бундан ташқари майдонда жонбозлик кўрсатиши учун футболчиларимиздан миннатдорман.

— Иброҳим Отахоновни иккинчи даврада чап қанот ҳимоячи сифатида кўряпмиз. Унинг жойини ўзгартириш мураббийларнинг қарорими?
— Чап қанот ҳимоя чизиғида муаммолар борлиги сабабли мураббийлар штаби Отахоновни бу жойда ўйнатишга қарор қилдик. У ёмон ҳаракат қилмаяпти. Футболчи профессионал бўлиши лозим. У исталган пайтда ҳужумда ёки ҳимояда ўйнашни билиши керак. Асосийси, Отахонов билдирилган ишончни оқлаяпти.