«Сўғдиёна» — «Локомотив» (0:2) учрашувидан сўнг ташкил этилган матбуот анжуманининг иккинчи қисмида Даврон Файзийев иштирок этди.

«Мағлубиятни тан олиш мардларнинг иши, бугунги мағлубиятда барча айбни ўз бўйнимга оламан. Ғалаба қозонса жамоа ютади, ютқазса — мураббий. Йигитларга кўрсатма бераётганимда сенсацияни қўлга киритишни истаётганимни айтгандим. Ўйлаган натижамизга эриша олмадик», -деб гап бошлади Файзийев.

«Ўз хатоларимиз туфайли мағлуб бўлдик. Иккита хато қилдик ва иккита гол ўтказиб юбордик. Бизда эса 5-6та вазият бўлди, худди рақиб дарвозаси сеҳрлангандек туюлди. Омад кучлиларга кулиб боқади. Барчаси ўз қўлимизда, ҳали ҳеч нима йўқотилмади. Бугунги йўқотилган очколарни Бухорода олишга уриниб кўрамиз.

Рақиб сафида Игнатий Нестеровни алоҳида таъкидлаган бўлардим. У гол бўладиган вазиятларда ўз жамоасини қутқариб қолди.

Ҳакамларни бошқарадиган ва текшириб борадиган ташкилот бор. Комиссарлар бор. Шу боис уларни ишини муҳокама қила олмайман. Ҳакамларнинг иши ҳақида гапиришга мураббийнинг ҳаққи йўқ, клубнинг ҳаққи бор.

Майдон ёмонлиги ҳақида баҳоналар кетмайди, иккала жамоа битта майдонда ўйнайди. Шу боис «асфальт» бўлса ҳам ўйнашимиз ва ғалаба қозонишимиз керак.

Кейинги турда Бухорога сафар қиламиз. Эдгар Гесс ишдан бўшатилгани ҳақида ҳозиргина матбуотдан ўқиб билдим. Бизда орқага йўл йўқ. Бухорога фақат ғалаба учун борамиз», — дейди Даврон Файзийев.