Хабарингиз бор, Хитойнинг Ченду шаҳрида футзал бўйича бўлиб ўтаётган клублар ўртасида Осиё чемпионатида Ватанимиз шарафини ўтган йили мамлакат чемпионатида ғолибликни қўлга киритган, Аҳаджон Юсупов мураббийлиги остидаги "Локомотив" футзалчилари ҳимоя килишмокда.

Ҳамюртларимиз пойтахт йиғинларини якунлагандан сўнг, кеча Тошкент - Пекин - Ченду йўналиши бўйлаб сафарга чиқиб кетишди. Парвоз давомида жамоа бош мураббийи Аҳаджон Юсупов билан бўлиб ўтган суҳбатимизда, у йиғинлардан кўнгли тўлганлиги ва бир қанча ташкил этилган назорат учрашувлари эса, жамоанинг янги ўйинчилари ва ўтган йили асосий таркибда ҳаракат қилган ўйинчилар бир бирлари билан уйғунлашиб, жамоавий ўйин кўрсатишларига катта ёрдам бергани ҳақида таъкидлаб ўтди. Умуман олганда, жамоа Пекинга кўтаринки кайфиятда етиб келди ва йигитларнинг ҳар бири Хитойга жиддий мақсадлар билан ташриф буюришгани ҳакида изоҳ беришди.

Маҳаллий вақт билан 17:45да Чендуга келиб қўнган делегацияни ОФК мутасаддилари илиқ тарзда кутиб олиб, "Хоумленд" меҳмонхонасига кузатиб қўйишди.

Шуни алоҳида таъкидлаб ўтиш жоизки, "Локомотив" жамоаси мутасаддилари ва мураббийлари мақсад фақат Олий эканлиги ва агар шоҳсупага кўтарилиш насиб қилса, ушбу ғалабани Мустақиллигимизнинг 23 йиллиги байрамига муносиб совға сифатида бағишланишини ният қилганликларини айтишди.