Ўзбекистонлик боксчи Сулаймонов Латипов энг енгил вазн тоифаси (49 кг. гача)да ўсмирлар ўртасидаги олимпия ўйинларининг финалига чиқди.
Қуръага кўра ўз иштирокини ярим финалдан бошлаган ҳамюртимиз финал йўлланмаси учун Субару Мурата (Япония) билан жанг олиб борди. Биринчи раундда тўла устунлик ҳамюртимиз томонида бўлди. Иккинчи ва учинчи раундларда япониялик боксчи вазиятни ўнглашга ҳаракат қилди. У деярли мақсадига эришди ҳам. Латипов атиги бир очко фарқи билан ғалабани ўз томонида оғдирди. Учала ҳакамнинг натижаси қуйидагича бўлди — 29:28, 29:28, 28:29.
Сулаймон Латипов финалда Руфат Ҳусейновга қарши рингга чиқади. Озарбойжонлик боксчи ярим финалда қозоғистонлик Шалкар Айхинбайни худди Латиповнинг жангида бўлган ҳисоб каби мағлуб этди. Финал жанглари 27 август куни бўлиб ўтади.
Дарвоқе, Латипов София шаҳрида бўлиб ўтган ўсмирлар ўртасидаги ЖЧнинг ярим финалида айнан Ҳусейновни мағлуб этиб, финалга чиққанди.
Бироз аввал 69 кг. вазн тоифасида Бектемир Мелиқўзиев ҳам финал йўлланмасини қўлга киритганди. Бугун 75 кг. вазнда Козимбек Мардонов украиналик Рамиль Гаджиев билан баҳс олиб боради.
