Футзал бўйича клублар ўртасидаги Осиё чемпионатида иштирок этаётган "Локомотив" дастлабки турда Япониянинг "Нагоя Оушенс" клубига 1:3 ҳисобида имкониятни бой бериб қўйди. Ўйиндан кейин ҳар иккала жамоа бош мураббийлари ўз фикрларини билдириб ўтди.

Виктор Гарсия, "Нагоя Оушенс" бош мураббийи:
— Бизни қийин ўйин кутиб турганини билардик. Чуқур ҳимояга ётадиган ва қарши ҳужумда ҳаракат қиладиган жамоага қарши ўйнаш қийин. Лекин биз уларга нисбатан босимни оширдик ва 2та гол уришга муваффақ бўлдик. Ўйинимиздан қониқиш ҳосил қилдим. Кўп жамоалар ушбу мусобақага махсус тайёргарлик кўришган. Биз эса миллий чемпонатимизда иштирок этяпмиз. Бир ҳафтада битта ўйин ўтказиш орқали биз янада кучлироқ жамоага айландик. Таркибимизда Япония терма жамоасининг тажрибали ўйинчилари ва легионерлар бор. Улар Хитойдаги шароитга тезда мослашиб олишди.

Аҳаджон Юсупов, "Локомотив" бош мураббийи:
— Иккала жамоа ҳам юқори савияда ўйнади. Фарқ шундаки, рақибимиз ўз имкониятларидан фойдаланди, биз эса фойдалана олмадик. Мағлубиятга қарамай, шогирдларимга хотиржамликни сақлаб қолиш кераклигини айтдим. Боиси, олдимизда яна 2та ўйин бор. Қолган ўйинларда ижобий натижа қайд этишга ҳаракат қиламиз.