Олий лиганинг 18-туридан ўрин олган "Локомотив" ва "Бунёдкор" жамоалари ўртасидаги ўйин ҳозиргина якунланди.

Ўйиннинг илк дақиқаларидан жамоалар очиқ футбол намойиш қила бошлашди. Ҳеч бир жамоа ҳимояга ётиб олмади. "Локомотив" рақибнинг олдинга ўтишини кутмаган шекилли, кўп вазиятларда орқа чизиқни бўш қолдираверди. Шу боис, "қалдирғочлар"нинг қарши ҳужумлари хавфлироқ кўриниш ола бошлади. Ўйиннинг 19-дақиқасига келиб эса ҳисобни айнан Лушан шогирдлари очишди. Сардор Рашидов томонидан ўнг қанотдан етказилган тўпга жарима майдончаси ичида турган Бекрич тўпга муваффақиятли зарба бера олмади. Тўп унинг оёғи тегиб, юқори кўтарилди ва Ўринбоев тўпни ерга туширмасдан, 12-13 метрда Нестеров дарвозасини ишғол қилди. Бу вазиятда "Локомотив" ҳимоячилари ҳар иккала ҳужумчини қаровсиз қолдиришганди.

Биринчи бўлим якунига яқин Валентин Коваленко жарима майдончаси ичида Фарҳод Тожиевга нисбатан ишлатилган қўполлик учун пенальти белгилади. Жабрланувчининг ўзи жарима зарбасини аниқ амалга оширди ва ҳисобни тенглаштирди.

Иккинчи бўлимда Лушан шогирдлари анча ақлли ўйин намойиш қилишди ва ўйинда устунликка эга бўлди. Улар қарши ҳужумларда бир қатор имкониятларга эга бўлишди. Ғалаба тўпи эса жарима тўпидан кейин киритилди. Рашидов жарима зарбасидан тўпни юқорилатиб жарима майдончасига узатди. Тўп рекошет ҳолатида Милошевичга келиб тушди ва Иван яқин масофадан дарвозани ишғол қилди. Тўп дарвоза устунига тегиб, дарвоза тўрига бориб тушди.

Ўйин охирларида Абрамов шогирдлари босимни кучайтиришди, аммо "қалдирғочлар" ғалабани сақлаб қолишди. Шу тариқа, "Локомотив" мавсумдаги илк мағлубиятини қабул қилиб олди.

ОЛИЙ ЛИГА-2014, 18-ТУР
18:00. "ЛОКОМОТИВ" - "БУНЁДКОР" - 1:2
Голлар: Фарҳод Тожиев (41-пен.) — Забиҳилло Ўринбоев (19), Иван Милошевич (69)
"Локомотив": 1. Игнатий Нестеров, 10.Фарҳод Тожиев, 17.Салим Мустафоев, Фозил Мусаев, 20.Ислом Тўхтахўжаев, 24.Иброҳим Раҳимов, 35.Шавкат Муллажонов,  50.Александр Гейнрих, 61.Дилшод Раҳматуллаев, 77.Жасур Ҳасанов (каттаси), 88.Лутфулла Тўраев
Захира: 84.Темур Жўраев, 4.Бобурбек Йўлдошев, 7. Садриддин Абдуллаев, 22.Виктор Карпенко, 23.Иван Нагаев, 60.Артём Филипосян, 70.Алишер Шоғуломов
"Бунёдкор": 45.Акбар Тўраев, 2.Акмал Шораҳмедов, 4.Хайрулла Каримов (С), 6.Анвар Ғофуров, 8.Жавлон Иброҳимов, 9.Минори Сато, 13.Иван Милошевич, 19.Забиҳилло Ўринбоев, 20.Самир Бекович, 21.Сардор Рашидов, 28.Достонбек Ҳамдамов.
Захира: 1.Павел Бугало, 11.Александр Пишур, 14.Воҳид Шодиев, 27.Сардор Собирхўжаев, 33.Олег Зотеев, 48.Акрамжон Комилов, 59.Нуриддин Ҳасанов
Ҳакамлар: В.Коваленко, М.Саидқосимов, Ҳ.Шодмонов, Р.Толибжонов
Назоратчи: Ғ.Каримов