УЕФА ЕЧЛ гуруҳ босқичи қуръасида жамоаларни саватчаларга ажратиш тизимига ўзгартириш киритмоқчи
УЕФА ташкилоти ЕЧЛ гуруҳ босқичига қуръа ташлаш олдидан жамоаларни саватчаларга ажратиш тизимига ўзгартириш киритмоқчи.

Янги қоидага кўра, биринчи саватчадан амалдаги чемпион ва УЕФА коэффициентлар жадвалида энг юқори рейтингга эга бўлган 7та мамлакатнинг чемпионлари ўрин оладиган бўлишди.

Ҳозирги тизимда эса биринчи саватчадан УЕФАнинг клублар рейтингида (бунда клубларнинг сўнгги 4 йилдаги натижалари инобатга олинади) энг юқори ўринларга эга бўлган 8та клуб ўрин оларди.

Англиянинг ўзи коэффициентлар жадвалида юқори рейтингга эга бўлганига қарамай, мамлакатнинг амалдаги чемпиони «Манчестер Сити» клублар рейтингида паст кўрсаткичга эга бўлгани боис пастки саватчалардан қуръага тортилди. Натижада "Сити" ўрин олган гуруҳ "ўлим гуруҳи"га айланди ("Бавария", "Манчестер Сити", ЦСКА, "Рома"). УЕФА янги тизимга ўтиш орқали, мана шундай ҳолатларнинг олдини олишни истамоқда.

УЕФА ижроқўми мазкур лойиҳани тасдиқласа, ушбу янгилик келгуси мавсумдан бошлаб амалиётга қўлланилади.