Киевнинг "Динамо" клуби собиқ бош мураббийи Олег Блохин жамоага қайтиши мумкин. Бу ҳақда киевликлар президенти Игорь Суркис хабар бермоқда.
Таъкидлаш жоиз, мутахассис шу йилнинг 16 апрелида "Шахтёр" клубига мағлубиятдан сўнг истеъфога чиқарилган эди. Шундан сўнг Блохин клубдан компенсация талаб қилган, сўнг шикоятини қайтариб олган эди.
"Ҳаётда ҳамма нарса бўлиши мумкин, - дейди Суркис. - Қизиққонлик ортда қолди. Биз яқин вақт ичида Олег Владимирович билан учрашиб, суҳбатлашамиз. Ишонинг, биз у билан душман эмасмиз. У "Динамо"га ўйинчи сифатида кўп иш қилган. Мураббий сифатида ҳам".
Эслатиб ўтамиз, Олег Блохин футболчилик фаолиятида "Олтин тўп" совриндори бўлган.
