Ўзбек футболининг метр мураббийларидан бири Юрий Вазгенович Саркисян 2015 йилги мавсумдан бошлаб яна “Нефтчи”ни бошқаришни бошлайди.
Arena.uz маълумотларига кўра, бир гуруҳ мухлислар Фарғона вилояти ҳокимига Юрий Саркисянни ортга қайтариш таклифи билан чиққан. Сабаб сифатида, мураббий истеъфога чиқарилгач барибир “Нефтчи”нинг ишлари юришиб кетмаганлиги, аксинча, катта пуллар сарфланган бўлишига қарамасдан қуйи поғоналарда юрганлиги келтирилган. Эътиборлиси, ҳоким бунга ижобий жавоб қайтарган.
Мухлисларнинг мурожаатидан сўнг ҳоким Юрий Саркисян билан боғланган ва жамоага қайтишини сўраган. Лекин Юрий Вазгенович ҳозирги шароитда ортга қайтиш тўғри эмаслигини таъкидлаб, янги мураббийлар штабига ҳеч бўлмаса шу мавсумнинг охирига қадар имконият беришларини сўраган.
Хуллас, оғзаки келишувга кўра, ҳоким ва Юрий Саркисян агар жамоанинг натижалари яхшиланмаса қишда клубга қайтишга келишиб олган. Шундай экан, хурсанд бўлаверинг фарғоналик ишқибозлар! Суюкли мураббийларинг яна Фарғонага қайтади.
