Таиландда бўлиб ўтаётган U-16 ўсмирлар ўртасидаги Осиё Чемпионати баҳсларида Қатар ўсмирлар терма жамоасига маслаҳатчи мураббий сифатида таклиф этилган ўтмишнинг афсонавий футболчиларидан бири Раул Гонсалес қисқа суҳбат давомида Осиё Чемпионати ҳақидаги таасуротлари билан ўртоқлашди.

Қатар терма жамоаси футболчилари ва бошқа делегация аъзолари Ўзбекистон ўсмирлари жойлашган мехмонҳонада истиқомат қилаётгани боис, ЎФФ матбуот хизмати вакили Шерзод Ражабов орқали Раул билан боғланишга муваффақ бўлдик.

— Таиландда Қатар ўсмирлар терма жамоасига маслахатчи мураббий сифатида ташриф буюрганингизни эшитдик.
— Ҳа, шундай. Қатар Футбол Уюшмаси таклифига кўра Таиландга келдим. Қатар ўсмирлар терма жамоаси мураббийлар штабига маслаҳатчи мураббий сифатида.

— Қатар ўсмирлар терма жамоасига мусобақада муносиб иштирок этиш ва юқори ўринларни қўлга киритиш вазифаси қўйилганми?
—  Қатарда истеъдодли ўсмирлар кўп. Улар ичидан вақти келиб яхши футболчилар етишиб чиқишига ишонаман. Мусобақада эса кучли жамоалар кўп. Ким ғолибликни қўлга киритса ҳам унга осон бўлмайди.

— Барча ўйинларни стадионда томоша қиляпсизми?
— Йўқ, фақатгина Қатар терма жамоасининг ўйинини ва гуруҳнинг иккинчи учрашувини стадионда томоша қилдик. Имкон бўлса қолган ўйинларни ҳам стадионда кузатиш ниятим бор.

Мадриднинг "Реал" клубининг ўтмишдаги юлдузларидан бири, кичик суҳбат сўнгида Осиё футболи жадаллик билан ривожланаётганини айтди.

— Осиёда футбол тез суратларда ўсмоқда. Осиёнинг етакчи жамоалари бошқа қитъанинг етакчи жамоалари билан бемалол беллаша олади. Бунга сўнгги натижалар мисол. Таиланддаги мусобақада иштирок этаётган барча жамоаларга эса омад тилайман.