Жанубий Корея ОАВлари ва Гонгконгнинг "South China Morning Post" нашри хабарига кўра, Ўзбекистон билан илк турдаги дурангдан сўнг гонгконглик футболчиларда ўзларига бўлган ишонч янада ошган.

Жанубий Кореянинг "Best Eleven" нашри Гонгконг терма жамоаси бош мураббийи, асли жанубий кореялик Ким Пан Гоннинг сўзларидан иқтибос келтиради:

"Ўзбекистон терма жамоаси ФИФА рейтингида 51-ўринда турган жуда кучли жамоа. Биз эса 160-ўринни банд этганмиз. Шунинг учун ўйинда табиийки, иккинчи рақам остида ўйнашга мажбур эдик. Ўзбекистон терма жамоасини ҳурмат қиламан. Аммо шу куни биз яхшироқ ўйнадик. Қолган иккала ўйинни ҳам ғалаба билан якунлаб, гуруҳда биринчи ўринни олишни мақсад қилганмиз".

Корейс нашрларига кўра, Ким Пан Гон 2011 йили Кей-лигадаги "Кёнгнам" клубида бир муддат ёрдамчи мураббий сифатида фаолият кўрсатгач, бутунлай Гонгконг футболига "шўнғиб кетган". Осиё Кубоги-2015 саралаш босқичида Ўзбекистон билан Тошкентда дуранг ўйнаб келганлиги - уни Гонконгда янада обрўсини ошириб юборганлиги айтилмоқда. "А" гуруҳида катта эҳтимол билан гуруҳ ғолиблигини мезбон Жанубий Корея терма жамоаси қўлга киритишини назарда тутиб, Ким Пан Гон "B" гуруҳида биринчи ўринни олишни кўзлаяпти. Гонгконг мураббийи мезбонлардан кўра Саудия Арабистони билан беллашиб кўришни осонроқ деб ўйлаяпти.

Мусобақанинг эндигина биринчи тури ўтганлиги ва яна иккита тур ўйинлари борлигини ҳисобга олсак, олдиндан бир нарса дейиш қийин. Шундай бўлсада Ўзбекистон терма жамоаси гуруҳдаги қолган икки ўйинда иложи борича кўпроқ гол киритиши лозим бўлади.

Отабeк Йўлдошeв
Жанубий Корeя, Сeул