Бугун Осиё Ўйинларида дзюдо бўйича 5та вазн тоифасида мусобақа ўтказилмоқда. Учта вазнда ўзбекистонлик спортчилар баҳсларда иштирок этишмоқда. Эркаклар ўртасидаги мусобақада Наврўз Жўрақобилов (73 кг.) ва Яҳё Имомов (81 кг.) кечки дастурда бўлиб ўтадиган ҳал қилувчи баҳсларда "бронза" медали учун татамига чиқадиган бўлишди.

Жўрақобилов баҳсларни 1/8 финалдан бошлади. У дастлаб хитойлик, чорак финалда эса яманлик рақибларини "иппон" билан мағлуб этди. Ярим финалда эса мўғулистонлик Одбайар Ганбаатарга ютқазди ("вазари"). Бронза медали учун жангда Наврўз кореялик Банг Гуи Манга қарши татамига чиқади.

Яҳё Имомовнинг нимчорак финалдаги рақиби татамига чиқмагани боис, ҳамюртимиз жангсиз чорак финалга ўтди. Аммо у чорак финалда қозоғистонлик Азиз Калкаман улига ютқазиб қўйди. Ўтиш баҳсида эронлик Қосимийнинг кураги ерга текказилганидан сўнг, Имомовда бронза медали учун курашиш имконияти юзага келди. Унинг рақиби — Кейта Нагашма (Япония).

Аёллар ўртасида 70 кг. вазн тоифасида иштирок этган Дилноза Матниёзова чорак финалдаёқ мўғулистонлик дзюдочига қарши баҳс олиб борди ва ютқазди. Ўтиш босқичида Дилноза қирғизистонлик Айжан Қадирбекова билан беллашади.