Таэквондонинг WTF йўналиши бўйича спортчилар баҳсларни давом эттиришмоқда. Бугун икки нафар ватандошимиз — Дилобар Сайдуллаева (57 кг.) ва Максим Рафалович (80 кг.) даянга чиқишди.

Дилобар Сайдуллаева дастлабки саралаш босқичда вьетнамлик рақибини чиройли тарзда мағлуб этди. Дастлабки икки раунд якунига кўра Сайдуллаева 0-3 ҳисобида имкониятни бой бераётган эди. Учинчи бўлимда у 4 очко ишлашга муваффақ бўлди ва кейинги босқичга ўтди. Аммо у чорак финалда таиландлик таэквондочига ютқазди (1-6).

Максим Рафалович нимчорак финалда вьетнамлик Нгуен ван Сонни катта фарқ билан енгди. Учинчи раунд олдидан Максим 1-3 ҳисобида имкониятни бой бераётганди. Ҳал қилувчи бўлимда эса Рафалович 9 очкони қўлга киритди ва баҳсни ўз фойдасига ҳал қилди - 10:4. Чорак финалда унга филиппинлик Кристиан Дела Круз рўпара келди. Ўта мураккаб кечган баҳсда Максим ғалабани қўлга киритди. Биринчи бўлимдан сўнг у 3-0 ҳисобида олдинга чиқиб олди. Аммо иккинчи бўлимда бироз бўшашди шекилли, филиппинлик 6-5 ҳисобида олдинга чиқиб олди. Сўнгги бўлимда яна ўз маҳоратини кўрсатган Рафалович жангни 10-9 ҳисобида ўз фойдасига ҳал қилди.

Кеча Максимнинг акаси Никита кумуш медални қўлга киритганди. Максим Рафалович ўзига медални нақд қилиб қўйди. Унинг энг юқори пробали медални қўлга киритишида омад тилаймиз.