Индонезия ёшлар терма жамоаси қитъа чемпионатининг 2-тури доирасида Австралияга қарши ўйинда жуда яхши ўйнаганига қарамай, мағлубият аламини тортишга мажбур бўлди.

Ўзбекистонга қарши бўлиб ўтган дастлабки ўйиннинг ўрталаридаги чиройли ўйин индонезияликларга ишонч бергани сезилиб турди. Улар ўйин бошиданоқ фақат ва фақат ғалаба учун майдонга тушганини кўрсатиб қўйишди. Тезкорлик ва тажовузкорлик бу ўйинда Индонезиянинг асосий шиори бўлди.

Ўз навбатида Австралия ёшлар терма жамоаси мазкур мусобақага яхши тайёргарлик кўрганини намойиш қилди. Улар рақибга нисбатан бироз кўпроқ ҳужум ташкил қилишди ва бунинг эвазига Индонезия дарвозасини бир марта ишғол қилишди (67-дақиқада). Жошуа Сотирио бирга-бир вазиятда тўпни дарвоза тўрига йўллади.

Умуман олганда, бугун ҳар икки дарвозабон жуда яхши ўйин намойиш қилиб, ўз дарвозаларини бир нечта муқаррар голлардан сақлаб қолди.

Ушбу ғалабадан кейин Австралия ўз очколарини 4тага етказиб олган бўлса, Индонезия чорак финалга чиқиш имкониятидан маҳрум бўлди. Ўзбекистон терма жамоаси соат 17:00да бошланадиган ўйинда БААни мағлуб этса, муддатидан аввал чорак финал тақдирини ҳал қилади.

Ёшлар ўртасида Осиё чемпионати, "В" гуруҳи, 2-тур
ИНДОНЕЗИЯ - АВСТРАЛИЯ - 0:1
Гол: Жошуа Сотирио (67)

"D" гуруҳи, 2-тур
УММОН-КХДР - 1:1
Голлар: Марван Муборак (72) — Со Чжонг Хёк (90)