Жанубий Кореянинг Инчеон шаҳрида ўтказилаётган ПараОсиё ўйинларида делегациямиз хазинаси яна биттадан олтин ва кумуш медалга бойиди.

Енгил атлетика бўйича 1500 метр масофага югуриш баҳсларида биринчи бўлиб марра чизиғини кесиб ўтган ҳамюртимиз Маъруфжон Муродиллаев ПараОсиё ўйинларининг навбатдаги олтин медалини делегациямиз ҳисобига келтирди.

Ядро улоқтириш бўйича ўтказилган мусобақаларда эса яна бир тажрибали спортчимиз Ҳусниддин Норбеков кумуш медаль совриндори бўлди. Эслатиб ўтамиз, Ҳусниддин Норбеков 2010 йили Гуанчжоу (Хитой)да бўлиб ўтган ПараОсиё ўйинларида ҳам кумуш медаль совриндори бўлган эди.

Шу тариқа, Ўзбекистон делегацияси 11 та олтин, 2 та кумуш ва 1 та бронза медалини қўлга киритган ҳолда умумжамоа ҳисобида 4-ўринда бормоқда.

Ҳамюртларимизга бўлажак мусобақаларда ҳам омад ва зафарлар тилаб қоламиз.