Кеча БААнинг Дубай шаҳрида пляж футболи бўйича Қитъалараро кубок мусобақаси якунланди.

Финалда Россия ва Бразилия терма жамоалари баҳс олиб боришди. Учта бўлимда иборат асосий вақтда 2:2 ҳисоби қайд этилди. Қўшимча бўлимда эса жанубий америкаликлар ғалаба тўпини киритиб, бош совринга эга бўлишди. Ушбу жамоалар гуруҳ босқичида ҳам тўқнаш келишган ва унда қўшимча бўлимда Россия ғалаба қозонганди.

Финални баҳсини ўзбекистонлик ҳакам Бахтиёр Намозов бошқариб борди. Таъкидлаш лозим, Намозов кетма-кет учинчи маротаба Қитъалараро Кубок мусобақасининг финалини бошқарди.

Эслатиб ўтамиз, барча қитъанинг энг кучли терма жамоалари иштирокида ҳар йили анъанавий тарзда ўтказиладиган мазкур турнирга бу йили БААнинг Дубай шаҳри мезбонлик қилди. Бу йилги турнирда барча қитъаларнинг энг кучли терма жамоалари саналган жами 8та терма жамоа ғолиблик учун кураш олиб боришди - Россия (жаҳон ва европа чемпиони), Португалия (европа вице-чемпиони), Бразилия (жаҳон вице-чемпиони, Конмебол чемпиони), АҚШ (Конкакаф чемпиони), Марокаш (Африка чемпиони), Эрон (Осиё Чемпиони), Япония (Осиё вице-чемпиони) ва БАА (мезбон).

Маълумот ўрнида, Бахтиёр Намозов ушбу мусобақада бунгача гуруҳ босқичида Эрон - Португалия (бош ҳакам), Япония - Россия (захира ҳаками) ва ярим финалда Португалия – Бразилия (бош ҳакам)учрашувларида ҳакамлик қилди.

Эслатиб ўтамиз, Бахтиёр Намозов пляж футболи бўйича ўзбекистонлик ягона ФИФА рефериси ҳисобланади.