Аргентиналик яримҳимоячи Анхель ди Мария ёзги трансферлар вақтида "ПСЖ"га ўтиши мумкин бўлгани, бу Париж клуби учун молиявий фэйр-плей қоидаларига зид бўлиши туфайли бу трансфер амалга ошмагани ҳақида гапириб берди. Эслатиб ўтамиз, ди Мария "Реал"дан "МЮ"га рекорд миқдордаги 59,7 миллион евро эвазига ўтганди.
"Менимча, "ПСЖ"нинг молиявий томондан муаммолари бор эди - улар ўйинчи сотиб олиш ҳуқуқига эга эмасдилар. Нима учун бу клубга ўтмаганимнинг асосий сабаби шу. Франция чемпионатида тўп суришдан анча хурсанд бўлардим. Ҳозир эса Англия премьер-лигасидаман.
Ҳеч қачон келажакда қаерда ўйнашингни билмас экансан. Менга кўплаб клублар қизиқиш билдирган эди. Уларнинг сони ҳақиқатан ҳам кўп эди! Бироқ "Манчестер Юнайтед" пайдо бўлиб, қаттиқ ғайрат кўрсатди, мени у ерда ўйнашимни исташди ва бу амалга ошди.
Келажакда Парижга бориш мен учун яхши тажриба бўларди. Биламан, ҳали ёшман, шу боис балки бир кун келиб "ПСЖ"да ҳам ўйнарман. Лекин ҳаммаси қандай тугашини ўзим билмайман", - деди ди Мария француз журналистлари билан суҳбатда.