"Бугун ҳакам ўйинни бутунлай бузиб ташлади. Биз бутун ўйин давомида устунлик қилдик, аммо ўйин охирида ҳакам барчасини барбод қилди. Келаётган Осиё Кубогида биз энг кучли жамоа эканлигимизни исботлаш ниятидамиз" (Сон Хюнг Мин, "Байер Леверкузен").
"Меҳмонхона, машғулот майдонларининг қониқарсиз аҳволдалиги Эронга хос доимий муаммо. Учрашув ҳаками ҳақида эса гапириб ўтирмайман. Буни ҳамма кўрди" (Ки Сонг Ёнг, "Суонси").
Бу 18 ноябрь куни Теҳрондаги маълуму машҳур "Озодий" ўйингоҳида кечган Эрон ва Жанубий Корея терма жамоалари ўртасидаги ўртоқлик ўйинидан кейин корейсларнинг етакчи футболчилари билдирган фикрлардан парча эди. Бу ўйин иккала терма жамоа учун ўртоқлик учрашуви мақомидан ҳам юқорироқ туришини ўйинолди матбуотдаги чиқишлардан сезиш қийин эмасди. Корейслар ўтган йили ЖЧ саралаш босқичидаги иккала ўйинда ҳам учралган мағлубият аламини олиш иштиёқида бўлсалар, мезбонлар корейслардан устун эканликларини яна бир карра исботлашларини айтиб ўтишди. Ҳаттоки, форслар бош мураббийи Карлос Кейруш ўтган йили Жанубий Корея терма жамоаси шаънига айтган аччиқ гаплари учун узр сўраган ҳам бўлди. Корейслар 1974 йилдан буён Теҳронда ғалаба қозона олишмаганлигига ишора қилиб, германиялик мураббий Ули Штилике бу нохуш анъанага нуқта қўйишини айтди. Ўртоқлик учрашувини ўзбекистонлик Валентин Коваленко бошчилигидаги ҳакамлар бригадаси бошқариб бориши маълум қилинди.
Ўйин жудаям эҳтиросларга бой тарзда ўтди. Иккала жамоа ҳам қатор хавфли вазиятларни амалга ошира олишди. Рисоладагидек кетаётган ўйиннинг 82-дақиқасида баҳсли гол корейслар дарвозасидан жой олди. Жарима зарбасидан кейин тўп дарвоза устунига теккан ҳолда қайтаётган бир пайтда Сердар Азмун боши билан тўпни дарвозага киритди. Ушбу вазият бутун Корея терма жамоаси захира ўриндиғию ОАВларини оёққа турғизиб юборди. Форслар футболчиси дарвозабонга нисбатан ўйин қоидасини бузганлигини бот-бот такрорларкан, голни бекор қилишга чақирувлар янгради. Аммо Коваленко қарорини ўзгартирмади ва эронликлар бундай вазиятда ғалабани қўлдан чиқарадиган жамоа эмасди.
Ўйиндан кейинги матбуот анжуманида корейслар мураббийи Ули Штилике дарғазаб ҳолатда эди. "Бугунги ҳакамликдан жуда норозиман", дея гап бошларкан, "Биринчи бўлимда Сон Хюнг Минга берилган сариқ карточкага мутлақо эътирозим йўқ. Аммо Эрон футболчилари биринчи таймда 20 марта ўйин қоидасини бузган бўлсалар-да, ҳакамлар сукут сақлашди. Бу ҳам етмагандек ҳакамнинг тушунарсиз қарори ортидан гол ҳам ўтказиб юбордик. Ҳакамлар бу ҳолатда тўғри қарор чиқаришмади. Биз Осиё Кубогида яхши натижага умид қиляпмиз ва юқори савияли ҳакам бошқарувида Эрон билан қайтадан беллашиб кўришни истаймиз. Биринчи бўлимда 1-2 вазиятни ҳисобга олмаганда Эронга ўйин бермадик ва мен шогирдларимнинг ўйинидан қониқдим", деди.
Бунга муносабат билдираркан Эрон терма жамоаси бош мураббийи Карлос Кейруш эса қисқагина қилиб: "Тоза гол эди. Корейслар мураббийи ҳакамнинг хатоси деётган бўлса - бу унинг фикри", деди.
Шу куни Кореянинг деярли барча ОАВларида ҳакамнинг хатти-ҳаракатлари салбий баҳоланган чиқишларга кўзимиз тушади. Шундай бўлса-да "Sports Kyonghyang" нашри орқали Кореянинг 3 нафар исми сир сақланган халқаро ҳакамлари интервью беришди ва гол киритилган вазиятда ўзбекистонлик ҳакам тўғри қарор чиқарганлигини таъкидлашган.
Отабек Йўлдошев
Жанубий Корея, Сеул
