“Насаф” футбол мактабининг 1998 йилда туғилган битирувчи ўқувчиларига сертификат топшириш маросими ўтказилди.

Маросимда “Насаф” футбол клуби бош менежери Шамил Ярулин сўзга чиқиб, клуб спорт директори Виталий Ни сўзга чиқишиб, ёш футболчиларнинг йил давомида қўлга киритган ютуқлари хусусида тўхталишди. Уларнинг келгуси фаолиятларига омадлар тилашди.

Дарҳақиқат, футбол мактабининг 1998 йилда таваллуд топган футболчилардан ташкил топган гуруҳи жорий мавсумда улкан ютуқларни қўлга киритишди.  Евгений Смирнов ва Умирқул Раҳматуллаев мураббийлигидаги жамоа дастлаб иккинчи лига мусобақаларининг Қашқадарё минтақасида ғолибликни қўлга киритди. Шунингдек, Олий ва биринчи лига жамоалари тайёрлов гуруҳлари ўртасида 2014 йилги Ўзбекистон биринчилигида чемпионликка сазовор бўлишди. Улар финалда “Бунёдкор” жамоасини 4:1 ҳисобида доғда қолдиришди.  Қолаверса, яқиндагина Самарқандда ўтказилган биринчи лигада ўтиши турнирида ҳам айнан “Насаф-1998” жамоаси ўз гуруҳида биринчи ўринни қўлга киритиб, биринчи лига йўлланмасига эга чиқди.   Шунингдек, Таиландда ўтказилган ўсмирлар ўртасидаги Осиё чемпионатида ушбу гуруҳ аъзоларидан 6 киши – дарвозабон Умид Эргашев, ҳимоячи Илҳом Алижонов, Достон Бердиқулов, ярим ҳимоячи Ислом Кенжабоев, ҳужумчилар Азиз Ғаниев ва Худойберди Ҳолиқов иштирок этишди. Шубҳасиз бу ютуқларни қўлга киритилишида футбол мактаби раҳбари Сергей Кучеренконинг хизматлари ҳам беқиёс.

Тадбир давомида футбол мактабининг энг иқтидорли, ўқиш ва жамоа ишларида фаол тарбияланувчиларига сертификат ва медаллар топширилди.