Келаси йилнинг 9 январида барчамиз орзиқиб кутаёган Осиё кубоги турнирига старт берилади. Мазкур турнирнинг бош соврини Осиё бўйлаб саёҳатини якунлаб, ниҳоят "яшил қитъа"га етиб келди. Айни дамда кубок Сидней соҳилларидан бирида.

Эслатиб ўтамиз, Осиё кубоги қитъа бўйлаб ўзининг саёҳатини сентябрь ойида Хитойдан бошлаган эди. Шундан сўнг Қатар, БАА, Жанубий Корея ва Японияда бўлиб, бугун тонгда Сиднейга етиб келди.

Энди соврин шу ҳафтадан мусобақа учрашувлари қабул қиладиган беш шаҳар – Сидней, Ньюкасль, Мельбурн, Канберра ва Брисбен бўйлаб янги саёҳатини бошлайди.

Турнир жами 32 учрашувдан иборат бўлиб, 9-30 январ кунлари бўлиб ўтади. Унда Осиёнинг энг сара 16 терма жамоаси ғолиблик учун баҳс олиб боради. Илк учрашув 9 январь куни Мельбурнда "А" гуруҳи вакиллари мезбон Австралия ва Қувайт терма жамоалари ўртасидаги баҳс билан бошланади.

Кубокнинг мезбон шаҳарлар бўйлаб саёҳати давомида футболчилар, мухлислар уни яқиндан кўришлари ва у билан суратга тушишлари мумкин. Бундан ташқари кубокни таништиришда ташкил қилинадиган турли ўйинларда ҳам қатнашиш имкониятига эга.

Кубок маҳаллий вақт билан соат 10:00дан тунги 00:00гача қуйидаги шаҳарларда омма эътиборида бўлади:

4 декабрь: Centenary Square (олдинги "Church St Mall"), Парраматта

6 декабрь: Wheeler Place (Уилер майлони), Ньюкасл

8 декабрь: Federation Square (Федерация майдони), Мельбурн

10 декабрь: Canberra Centre (Канберра маркази), Канберра

12 декабрь: Queen St Mall, Брисбен

Эслатиб ўтамиз, мазкур турнирда Ўзбекистон терма жамоаси "В" гуруҳидан ўрин олган бўлиб, илк баҳсни Шимолий Корея термасига қарши (10 январь) ўтказса, 2-турда Хитой (14 январь) ва сўнгги турда Саудия Арабистони (18 январь) термалари билан куч синашади.