Навбатдаги чемпионатимизни якунланганлиги деярли бир ой бўлди. Турли соҳаларда бўлгани каби якунларни сарҳисоб қилиш миллионлар ўйинида ҳам мавжуд. Бугун жамоамизнинг якунига етган чемпионатдаги иштирокини рақамларга асосланган ҳолда таҳлил қилиб чиқамиз.

XXIII чемпионатда жамоамиз шарафини 26 нафар футболчи ҳимоя қилди. Уч нафар футболчи биринчи давра якунига етгач бошқа клублар сафига ўтиб кетган бўлса уларнинг ўрни янги таклиф этилган олти нафар футболчи билан тўлдирилди. Тажрибали ҳимоячиларимиздан бири Раҳматилло Бердимуродов чемпионатдан ўрин олган 26 та ўйинда майдонга тушиб, учрашувларда қатнашиш борасида пешқадамликни қўлга киритди. Бердимуродовнинг майдондаги дақиқалари сони 2235ни ташкил этди. Чемпионатда жамоамиз дарвозасини уч нафар дарвозабон қўриқлади. Биринчи даврадан ўрин олган ўйинларда Дониёр Усмонов ва Хуршид Хўжаевлар қўриқлашди. Давралар оралиғида сафга қўшилган болгариялик дарвозабон Петар Денчев ҳисобидаги ўйинлар сони 11 тани ташкил этди.

Жамоамиз иштирокидаги ўйинларда 11 хил натижа қайд этилди. Натижалар орасида 1:0, 2:0 ва 3:1 ҳисоблари беш мартадан кузатилди. Эътиборли жиҳати, ана шундай ҳисоб қайд этилган учрашувларнинг тўрттасида “Навбаҳор” мағлубиятга учраган. 0:2 ҳисобида эса учта ўйин бой берилган бўлса иккитасида ғалаба қўлга киритилган. Чемпионат давомидаги ўйинларда 3:0 ҳисоби эса уч бор кузатилди. Ана шундай натижа қайд этилган учрашувнинг иккитасида ғалаба тантана қилинган. 4:2 ҳисоби эса икки марта учраб, ҳар иккисида ҳам жамоамиз уч очкони қўлга киритган. 0:0, 1:1, 2:2, 2:1, 5:4 ва 4:1 ҳисоблари эса бир мартадан учради.

Қуйида эътиборингизга ҳавола этилаётган жадвалларга назар ташлаб яна бошқа маълумотларга ҳам эга бўласиз.