Халқаро футбол уюшмалари федерацияси (ФИФА) 2018 ва 2022 йилги жаҳон чемпионатлари мезбонларини аниқлашда коррупцияга йўл қўйилгани тўғрисидаги ҳисоботларни тўлиқ чоп этиш ҳақида қарор қабул қилди.
BBC News’нинг манбалари берган хабарга кўра, Марокашнинг Марракеш шаҳрида бўлиб ўтган учрашувда ФИФА Ижроия қўмитаси ФИФАнинг мустақил терговчиси Майкл Гарсия томонидан тайёрланган ҳисоботни эълон қилинишини бир овоздан маъқуллаган.
Аввалроқ, Гарсия ўзи тайёрлаган ҳисобот ФИФА томонидан ўзи хоҳлагандек фойдаланилмаганидан норози бўлиб, истеъфога чиққанди. BBC News’нинг ўз манбаларига асосланиб хабар беришича, Гарсиянинг ҳисоботи тўлиқ кўринишда фақат бир шарт билан – “жорий суриштирувлар якунига етгач” эълон қилинади.
Эслатиб ўтамиз, 2018 йилги жаҳон чемпионати мезбонлигини Россия, 2022 йилгисини эса Қатар қўлга киритган. Бироқ, Буюк Британия ва АҚШ ушбу мусобақалар мезбонлиги ҳалол йўл билан қўлга киритилганини шубҳа остига олган, шундан сўнг ФИФА тергов-суриштирув ҳаракатлари бошлаган эди.
