Ўзбекистонлик теннисчи қиз Оқгул Омонмуродова Туркиянинг Анқара шаҳрида ўтаётган ITF таснифидаги теннис мусобақасининг финалига йўл олди, дея хабар бермоқда Sports.uz.
Омонмуродова ярим финалда ўзининг навбатдаги рақибаси — украиналик Юлия Бейгельзимерни мағлуб этди. Ушбу ўйин ҳар иккала теннисчи учун ҳам жуда қийин ўтиб, 2 соату 13 дақиқа давом этди.
Биринчи сетда ўзбекистонлик теннисчи 1:6 ҳисобида ютқазиб қўйди. Иккинчи сет эса тайбреккача давом этиб, Омонмуродованинг 7:6 ҳисобидаги устунлиги билан якунланди. Учинчи сетда эса, кучи қолмаган украиналик теннисчи 2:6 ҳисобида таслим бўлди.
Энди Оқгул Омонмуродова финалда Сербия вакиласи Александра Крунич билан учрашади. Бу теннисчи ярим финалда бошқа бир украиналик спортчи Валентина Ивахненкони 6:4, 6:4 ҳисобларида мағлуб этган.
Маълумот учун, “Ankara Cup”нинг мукофот жамғармаси 50 минг еврони ташкил этади.
