Ҳиндистон Суперлигасининг ҳал қилувчи финал учрашувида “Керала Бластерс” ҳамда “Атлетико Де Калькутта” клублари тўқнаш келишди. Мумбай шаҳрида ўтказилган учрашувни ўзбекистонлик ҳакамлар бригадаси бошқариб борди.

Осиёнинг беш карра энг яхши реферисига қанотларда ФИФА лайнсменлари Абдуҳамидулло Расулов ва Жаҳонгир Саидовлар ёрдам беришди. Бу Эрматов ва унинг бригадаси учун Ҳиндистон Суперлигасидан тушган иккинчи таклиф доирасидаги иккинчи учрашув бўлди.

Равшан Эрматов бунгача 15-25 ноябрь кунлари ҳам Ҳиндистон Суперлигаси учрашувларини бошқарган эди. Ҳиндистон чемпиони номини аниқлаб берган ўйинда биргина гол учрашув тақдирини ҳал қилди. Воқеалар ривожи қўшимча бўлимларга қараб бораётганди. Эрматов иккинчи бўлимдаги тўхталишлар ўрнини қоплаш учун асосий вақтга 3 дақиқа қўшиб берди.

Сўнгги дақиқа ўтаётганда “Керала” таркибида ўзгариш бўлди. Эрматов футболчиларга яна бир дақиқа ўйнаш имкониятини берди. Айнан сўнгги дақиқада Муҳаммад Рафиқ чехиялик легионер Якуб Поданининг бурчакдан узатиб берган тўпини дарвозага йўллаб, “Атлетико”га чемпионликни тақдим этди.

КЕРАЛА БЛАСТЕРС – АТЛЕТИКО ДЕ КАЛЬКУТТА – 0:1 (0:0)
Гол: Муҳаммад Рафиқ 90+5
Огоҳлантиришлар: Нирмал Четтри 26, Офентсе Нато 37, Хосеми 39, Саумик Дей 44, Борха 57, Сандеш Жхинган 67, Муҳаммад Рафиқ 88.
20 декабрь. Мумбай. Patil Stadium. 36.84 томошабин
Бош ҳакам: Равшан Эрматов (Ўзбекистон)