“Андижон” жамоасини янги мавсумга пухта тайёргарлик кўриш учун ўтказаётган дастлабки ўқув-машғулот йиғини кеча ниҳоясига етди. 15 декабрда бошланган йиғин икки ҳафта давом этди.

Машғулотлар кунига икки маҳалдан Шўрбулоқ даҳасидаги сунъий қопламали майдонда олиб борилди. Бош мураббий Эдгар Гесс Германияга кетганини хабар қилгандик. Шу сабабли машғулотларни унинг ёрдамчилари Олег Тюлькин, Виталий Легай ва Қаҳрамон Абдуқодиров олиб боришди. Шу ўринда клуб мутасаддилари жамоа тақдирига бефарқ қарашмаётганини ҳам алоҳида таъкидлаб ўтиш жоиз. Шанба кунги эрталабки машғулотдан кейин Андижон шаҳри ҳокими, “Андижон” клуби президенти Н.Ғ.Алимов футболчилар билан учрашиб, бир пиёла чой устида суҳбатлашди. Клуб президентининг ташрифидан футболчилар мамнун бўлишганини айтиб ўтиш керак.

Бугун йиғиннинг сўнгги кунида икки томонлама ўйин ташкил этиб, мураббийлар футболчиларни синовдан ўтказишди. Таркиб “қизиллар” ва “яшиллар”га ажратилди. Ушбу баҳсда 1:1 ҳисоби қайд этилди.

“Қизиллар”: Лочин Долимов, Шояд Муллажонов, Толиб Очилов, Ринат Муслимов, Дилмурод Маҳмудов, Жасур Юлдашев, Фарҳод Бекмуродов, Фозилов, Акмал Эргашев, Шохсултон Парпиев, Виталий Зотеев.
“Яшиллар”: Дилмурод Мамаюсупов, Асрор Раҳмонов, Артур Маматказин, Даврон Турсунов, Акбар Ходжаев, Бекзод Ғозиев, Расул Раҳмонов, Иброҳим Отахонов, Фарруҳ Мирзаев, Исроил Турсунов, Лочин Солиев.
Голлар: И.Турсунов – А.Эргашев.

Дарвозабон Элдор Исабоев ва ҳимоячи Раҳим Қодиров бетоблиги сабабли ўйинда иштирок эта олишмади. Ушбу учрашувдан сўнг футболчиларга Янги йил байрами муносабати билан қисқа муддатли дам берилди. Бундан ташқари кўрикдан ўтиш жалб этилган Дилмурод Мамаюсупов, Жасур Юлдашев, Акмал Эргашев каби футболчиларга жавоб берилди.

Жамоамизни Янги йил байрамидан сўнг иккинчи йиғини 4 январдан яна Андижонда бошланади.