КХДР миллий терма жамоаси Осиё кубоги-2015га сирли тарзда тайёрланди. Шимолий кореяликларнинг тайёргарлик режаси, жойи ва ўртоқлик ўйинлари мутлақо сир сақланди.
Кореяликлар кейинги ҳафта бошида Австралияга етиб боришади. Терма жамоа машғулот режаси катта давлат сири ҳисобланиб келинди. Битта нарса аниқ, КХДР Австралияга йўл олишдан аввал ҳозирда Хитойнинг Хайнан провинциясида йиғин ўтказмоқда.
Бошқа 15та терма жамоа ўзининг ўқув-машғулот йиғини ва ўртоқлик ўйинларини ОАВдан яширмаган.
КХДР бош мураббийи Юн Чжонг Су Осиё Ўйинларида ҳакамни ҳақорат қилгани учун ОФК томонидан 1 йилга дисквалификация қилинди. У расмий шахслар рўйхатига киритилган. У машғулотларда иштирок этиши мумкин, аммо захира ўриндиғида ўтира олмайди. Шу боис Чжо Донг Соб бош мураббий этиб тайинланди.
Ёдингизда бўлса, ЖАР-2010да шимоллик корейслар терма жамоани қўллаб-қувватлаш учун ёлланган "мухлислар" хизматидан фойдаланишганди. Улар бир хил кийинган хитойликларни мухлис сифатида ёллашганди. Бу сафар улар қандай режа ишлаб чиқишган экан?
КХДРнинг Осиё кубоги-2015даги илк ўйини 10 январь куни Ўзбекистонга қарши бўлиб ўтади.
